«Real» Ronalduga qo‘llangan diskvalifikatsiya bo‘yicha apellyatsiya beradi

«Real» klubi o‘z hujumchisi Krishtianu Ronalduning 5 o‘yinga diskvalifikatsiya qilinishi yuzasidan apellyatsiya beradi. Bu haqda AS xabar tarqatdi.

Ispaniya qirolligi futbol federatsiyasi (RFEF) madridliklar jamoasining Ispaniya Superkubogi uchun «Barselona»ga qarshi kechgan va 3:1 hisobidagi g‘alaba bilan yakunlangan uchrashuv vaqtida bosh hakam Rikardo Bengoecheani turtib yuborgani uchun Ronalduga jazo tayinlagandi.

RFEF futbolchining bu harakatlarini agressiv deya baholab, uni qizil kartochka uchun 1 o‘yinga, hakamni turtgani uchun 4 o‘yinga diskvalifikatsiya qilgandi.

Agar bu jazo o‘z kuchida qoldirilsa, Ronaldu «Barselona»ga qarshi Superkubok javob o‘yinini, shuningdek Ispaniya chempionati startidagi «Deportivo», «Valensiya», «Levante» va «Real Sosedad» jamoalariga qarshi bahslarni o‘tkazib yuboradi.