AFP: Fransiya Iroqqa 430 mln yevro ajratadi

Fransiya 2017 yil davomida Iroq hukumatiga 430 mln yevrolik kredit ajratadi. Bu haqda AFP axborot agentligiga Fransiya tashqi ishlar vaziri Jan-Iv Le Drian atrofidagi manba ma'lum qilgan. Le Drian 26 avgustda Bag‘doddga kelgan. 

Axborot agentligi ma'lumotlariga ko‘ra, Le Drian Bag‘dodga moliyaviy yordam berish masalasini Iroq bosh vaziri Haydar al-Obodiy bilan muhokama qilgan. Le Drian muzokaralar davomida Al-Obodiyga mablag‘lar joriy yil oxirigicha ajratilishiga va'da bergan. Bu mablag‘lar avvalambor Iroq hukumati tomondan amalga oshirilayotgan  iqtisodiy islohotlarni qo‘llab-quvvatlashga qaratilgan.

“Fransiya IShIDga qarshi kurashning boshidan beri Iroqda bo‘lgan. U hozirda boshlanayotgan tinchlikning qurilishi bosqichida ham bu yerda bo‘ladi”, deb aytgan Le Drian uchrashuvda.

Le Drian, shuningdek Al-Obodiyga Fransiya prezidenti Emmanyuel Makronning uning Parijga kelishi taklifini yetkazib qo‘ygan.