Putin, Nazarboyev va Erdo‘g‘an Mirziyoyevni tabrikladi

Mamlakatimiz mustaqilligining 26 yilligi munosabati bilan O‘zbekiston Respublikasi Prezidenti Shavkat Mirziyoyev nomiga xorijiy davlatlar va hukumatlar, nufuzli xalqaro tashkilotlar rahbarlaridan samimiy qutlovlar kelmoqda. Ularda davlat rahbariga baxt-saodat, omonlik va muvaffaqiyatlar, O‘zbekiston xalqiga tinchlik-osoyishtalik, ravnaq hamda farovonlik tilab, chin dildan ezgu istaklar izhor etilgan.  Bu haqda O‘zA xabar berdi.

Xususan, Rossiya Federatsiyasi Prezidenti Vladimir Putinning maktubida shunday deyiladi:

“O‘zbekiston Respublikasi Prezidenti 
Shavkat Mirziyoyev Janobi Oliylariga 

Muhtaram Shavkat Miromonovich! 

Sizni O‘zbekiston Respublikasi Mustaqillik kuni bilan chin qalbimdan muborakbod etaman. 

O‘zbekistonning iqtisodiy va ijtimoiy taraqqiyotda erishgan muvaffaqiyatlari barchaga ma'lum. O‘zbekiston jahon miqyosida yuksak nufuzga ega mamlakat sifatida xalqaro muhim masalalarni hal etishda alohida o‘rin tutadi. 

Davlatlarimiz o‘rtasida strategik sheriklik va ittifoqchilik munosabatlari izchil rivojlanib borayotganini mamnuniyat bilan ta'kidlayman. O‘zaro aloqalarning barcha yo‘nalishlari bo‘yicha hamda Markaziy Osiyoda barqarorlik va xavfsizlikni mustahkamlash yo‘lidagi hamkorlikni yanada rivojlantirish borasidagi ishlarni Siz bilan birgalikda davom ettirishga tayyor ekanimni tasdiqlamoqchiman. Ishonchim komilki, bu Rossiya va O‘zbekiston xalqlarining manfaatlariga to‘la mos keladi. 

Sizga, muhtaram Shavkat Miromonovich, chin qalbimdan mustahkam sog‘liq va muvaffaqiyatlar, xalqingizga baxt-saodat va farovonlik tilayman. 

Hurmat bilan, 

Vladimir Putin,
Rossiya Federatsiyasi Prezidenti”

Qozog‘iston Respublikasi Prezidenti Nursulton Nazarboyev o‘z qutlovida shunday fikrlarni bildirdi:

“O‘zbekiston Respublikasi Prezidenti 
Shavkat Mirziyoyev Janobi Oliylariga 

Muhtaram Shavkat Miromonovich! 

Sizni Qozog‘iston xalqi va shaxsan o‘z nomimdan O‘zbekiston Respublikasining Milliy bayrami – Mustaqillik kuni munosabati bilan samimiy muborakbod etaman. 

O‘zbekiston Respublikasi mustaqillik yillarida milliy davlatchilik asoslarini mustahkamlash, xalq farovonligini yuksaltirish, mamlakatning xalqaro nufuzini oshirish borasida ulkan yutuqlarga erishdi. 

Qozog‘iston qardosh O‘zbekiston bilan har tomonlama hamkorlikni mustahkamlashga alohida e'tibor qaratadi. Davlatlarimiz o‘rtasidagi do‘stlik va yaxshi qo‘shnichilik munosabatlari bundan buyon ham o‘zaro ishonch va xalqlarimizning qo‘llab-quvvatlashi asosida izchil rivojlanishda davom etishiga qat'iy ishonaman. 

Muhtaram Shavkat Miromonovich, Sizga mamlakat taraqqiyoti yo‘lida davlat rahbari lavozimidagi faoliyatingizda mustahkam sog‘liq, ulkan zafarlar va cheksiz shijoat, qardosh O‘zbekiston xalqiga tinchlik va farovonlik tilayman. 

Ezgu tilaklar bilan, 

Nursulton Nazarboyev,
Qozog‘iston Respublikasi Prezidenti”.

Shuningdek, Turkiya Respublikasi Prezidenti Rajab Toyyib Erdo‘g‘anning maktubida shunday deyiladi:

“O‘zbekiston Respublikasi Prezidenti 
Shavkat Mirziyoyev Janobi Oliylariga 

Muhtaram Prezident janoblari! 

Qadrli qardoshim! 

Siz Janobi Oliylarini, Sizning timsolingizda butun o‘zbek xalqini O‘zbekistonning Milliy kuni munosabati bilan muborakbod etishdan bag‘oyat baxtiyorman. 

Diplomatik munosabatlarimiz o‘rnatilganining 25 yilligiga to‘g‘ri kelgan 2017 yilda hamkorligimiz sezilarli darajada faollashdi. O‘tgan yil noyabr oyida Samarqanddagi uchrashuvimiz bu jihatdan burilish nuqtasi bo‘lib xizmat qildi va muntazamlik kasb etgan oliy darajadagi muloqotlar orqali munosabatlarimiz barcha sohalarda jadal rivojlanmoqda. Ishonamanki, shu yil oktabr oyida Sizning Turkiyaga amalga oshiradigan tashrifingiz bugungi kundagi munosabatlarimizni yangi bosqichga ko‘tarishda muhim ahamiyat kasb etadi. 

Xalqlarimiz o‘rtasidagi qadimiy do‘stlik rishtalari mustahkam poydevor bo‘lgan Turkiya – O‘zbekiston munosabatlarini Siz Janobi Oliylari bilan birga yanada rivojlantirish tarix oldidagi mushtarak mas'uliyatimizdir. 

Fursatdan foydalanib, Siz Janobi Oliylariga sihat-salomatlik, baxt-saodat, qardosh o‘zbek xalqiga omonlik va farovonlik tilayman. 

Rejyep Tayyip Erdo‘g‘on,
Turkiya Respublikasi Prezidenti”.

Bundan tashqari, quyidagilar o‘z tabriklarini yo‘llagan:

Koreya Respublikasi Prezidenti Mun Chje In

Saudiya Arabistoni Podshohi, Ikki muqaddas masjid xodimi Salmon bin Abdulaziz Ol Saud

Belgiyaliklar Qiroli Filipp

Armaniston Respublikasi Prezidenti Serj Sargsyan 

Belarus Respublikasi Prezidenti Aleksandr Lukashenko 

Tojikiston Respublikasi Prezidenti Imomali Rahmon 

Hindiston Respublikasi Prezidenti Ram Natx Kovind 

Saudiya Arabistoni Podshohligi valiahdi, Vazirlar Mahkamasi raisining o‘rinbosari Muhammad bin Salmon bin Abdulaziz Ol Saud 

Jazoir Xalq Demokratik Respublikasi Prezidenti Abdulaziz Buteflika 

Singapur Respublikasi Prezidenti Toni Tan Keng Yam 

Italiya Respublikasi Prezidenti Serjio Mattarella 

Polsha Respublikasi Prezidenti Andjyey Duda 

Qutlovlar kelishi davom etmoqda.