Toshkent xalqaro moliya markazi bo‘yicha Konstitutsiyaviy qonun kutilmoqda

Davlat rahbari so‘nggi yillarda investorlar tomonidan ilgari surilgan tashabbuslar davlat siyosati va qonunchilikda o‘z aksini topayotganini ta’kidladi.

«Yaqinda O‘zbekiston Iqtisodiy hamkorlik va taraqqiyot tashkilotining Xalqaro investitsiyalar va ko‘p millatli korxonalar to‘g‘risidagi deklaratsiyasiga qo‘shilishi e’lon qilindi. Ushbu yo‘nalishdagi ishlarning mantiqiy davomi sifatida Toshkent xalqaro moliya markazi to‘g‘risidagi Konstitutsiyaviy qonun qabul qilinishi kutilmoqda. Bularning barchasi g‘oyalaringiz amaliyotda izchil tatbiq etilayotganining yorqin dalilidir», — dedi prezident.

Ma’lum qilinishicha, o‘tgan davrda Xorijiy investorlar kengashi huzuridagi ishchi guruhlar tomonidan investorlar uchun 50 dan ortiq uchrashuv va muhokamalar tashkil etildi.

Ularda muqobil investitsiya jamg‘armalari, garov qonunchiligi, mas’uliyatli biznes yuritish, professional kadrlar tayyorlash, soliq ma’murchiligi, yer ajratish va energetika sohalaridagi dolzarb masalalar xorijiy investorlar hamraisligida atroflicha ko‘rib chiqildi.