BMT Meksikaga yordam taklif qildi

BMT Meksikada ro‘y bergan juda kuchli zilzila oqibatlarini bartaraf etishda bu davlat hukumatiga yordam taklif qildi. Bu haqda BMT bosh kotibi rasmiy vakili Stefan Dyujarrikning tashkilot saytida e'lon qilingan bayonotida aytiladi.

«BMT bosh kotibi Antoniu Guterresh zilzila sabab Oaxaka, Chyapas va Tabasko viloyatlarida insonlar qurbon bo‘lgani va yirik vayronagarchiliklar yuz berganidan chuqur qayg‘uda», - deyiladi bayonotda.

Dyujarrikning qo‘shimcha qilishicha, BMT Meksika hukumati iltimos bilan chiqsa, yordam berishga tayyordir.

Avvalroq Meksikada zilzila tufayli 61 kishi halok bo‘lgani, 1,1 mingdan ortiq maktab jiddiy zarar ko‘rgani xabar qilingandi.