Janubiy Koreya KXDR raketa uchirishiga javoban o‘z sinovini o‘tkazdi

Janubiy Koreya KXDRning raketa uchirishiga javoban o‘z sinovini o‘tkazdi, deb xabar qilmoqda Yonxap agentligi Koreya Qurolli kuchlari shtab boshliqlari birlashgan qo‘mitasiga tayangan holda. 

Ma'lum bo‘lishicha, mahalliy vaqt bilan 3:23-3.44 oralig‘ida quruqlik, harbiy-dengiz va harbiy-havo kuchlarining birlashgan raketa mashg‘ulotlari o‘tkazilgan. Unda KXDRga aniq zarbalar berish amaliyotlari o‘tkazilgan. Shu munosabat bilan 300 km.ga parvoz qila oladigan "Xyonmu-2" ballistik raketasi uchirilgan. Bundan tashqari "kema — yer" rusumidagi 1000 km.ga uchadigan "Xeson-2" raketasi hamda "havo-yer" tasnifidagi 57 km.gacha nishonni ura oladigan "Spays-2000" raketasi sinalgan.
 
Avval xabar qilinganidek, KXDR 29 noyabrga o‘tar kechasi qit'alararo ballistik raketa sinovini o‘tkazgan edi. U 960 km masofaga parvoz qilib, Yaponiya qirg‘oqlaridan 210 km uzoqlikda dengizga qulagan. Mazkur raketaning parvoz trayektoriyasi avvalgilariga qaraganda ancha baland bo‘lgan.