OAV: Britaniya bosh vaziriga suiqasdning oldi olindi

Buyuk Britaniya kontrrazvedka xizmati MI5 rahbari Endryu Parker xavfsizlik xizmatlari Buyuk Britaniya bosh vaziri Tereza Mey hayotiga suiqasdni bartaraf etishganini ma'lum qildi. Bu haqda Independent nashri xabar bermoqda.

Nashr ma'lumotlariga ko‘ra, Meyga suiqasd qilishga tayyorgarlik ko‘rish gumoni bilan o‘tgan haftada London va Birmingemda 2 kishi qo‘lga olingan. Ularga terrorchilik moddasi bo‘yicha ayblov qo‘yilgan. Ma'lum qilinishicha, gumonlanuvchilar sumka ostiga niqoblangan bombani bosh vazir qarorgohi yonida portlatib, so‘ngra pichoq bilan hujum qilishmoqchi bo‘lgan.   

London politsiyasining ma'lum qilishicha, Londonda yashovchi 20 yoshli Zakariyo Rahmon va Birmingemda yashovchi 21 yoshli Muhammad Aqib Imronga terakt tayyorlash aybi qo‘yilgan. Biroq Skotland-Yardda bu ikki yigitning qo‘lga olinishi Meyga suiqasd bilan bog‘langanini tasdiqlashdan bosh tortilgan. Ma'lum qilinishicha, qo‘lga olinganlar 6 dekabrda Vestminsterdagi sud oldida javob berishlari kerak bo‘ladi.  

5 dekabrda Parker vazirlar mahkamasi yig‘ilishida oxirgi yil ichida Buyuk Britaniyada 9 ta teraktning oldi olinganini ma'lum qilgan. Umumiy hisobda joriy yilda Buyuk Britaniyada 5 ta terakt sodir etilgan. Ulardan eng yirik 22 may kuni qo‘shiqchi Ariana Grandening konserti vaqtida amalga oshirilgan. Bu terakt oqibatida 22 kishi, jumladan, 12 bola halok bo‘lgandi.