OAV: Daniya sudi IShIDga qo‘shilgan daniyalikni fuqarolikdan mahrum etdi

Daniyada IShIDga qo‘shilgan daniyalik fuqarolikdan mahrum etildi. Shuningdek, Glostrup shahri sudi 22 yoshli erkakka 5 yillik qamoq jazosi tayinladi, deb xabar qilmoqda Ritzaus Bureau.

Jazoirdan ko‘chib kelgan muhojirlar oilasida Daniyada dunyoga kelgan Anis Laraba 2013 yili, 18 yoshida Suriyaga borgan. U o‘rta maktabni yakunlashga ham ulgurmagan edi. Oradan 9 oy o‘tgach, ota-onasidan yo‘l haqini to‘lashni so‘rab Daniyaga qaytgan. 

Sud uni terrorchilik tashkilotiga qo‘shilishda aybdor deb topdi. Uning Suriyada uzoq vaqt qolib ketgani va terrorchilar tomonida jangovar harakatlarda ishtirok etgani og‘irlashtiruvchi holatlar deb topilgan. Laraba o‘z aybini inkor etmoqda va hukm ustidan arz qilish niyatida.