Hindistonda avtobusning daraga tushib ketishi oqibatida 7 kishi halok bo‘ldi 

Hindistonning shimolida avtobusning daraga tushib ketishi oqibatida kamida 7 kishi halok bo‘ldi, 26 kishi og‘ir jarohatlar oldi. Bu haqda Jammu va Kashmir shtati politsiyasida ma'lum qilindi.

Ma'lum qilinishicha, yo‘l-transport hodisasi Ramnagar shahridan 3 km uzoqlikda, tog‘dan o‘tuvchi yo‘lning murakkab qismida yuz bergan. Avtobus shahardagi ibodatxonalardan biriga ziyoratchilarni olib ketayotgan bo‘lgan.

Tergovning aniqlashicha, haydovchi uxlab qolgan va avtobus boshqaruvini qo‘ldan chiqargan. Shundan keyin avtobus 120 metr balandlikdan ag‘anab ketgan. 4 nafar yo‘lovchi voqea joyida, 2 nafari shifoxonaga yo‘lda va yana bir nafari shifoxonada vafot etgan.