Armaniston mojarosi: yuzdan ortiq namoyishchilar qo‘lga olindi

Foto: Sputnik Armeniya

Armaniston politsiyasi payshanba kuni Yerevan markazida 106 namoyishchini qo‘lga oldi. Bu haqda TASS politsiya matbuot kotibi Ashot Agaronyanga asosan xabar bermoqda.

"Soat 13:30 (Toshkent vaqti bilan soat 14:30)da Yerevan politsiyasi bo‘linmalarida 106 nafar shaxs saqlanmoqda. Agarda ular uch soatdan keyin qo‘yib yuborilmasa, demak, ular huquqbuzarliklarda gumonlanmoqda", - deya ta'kidlab o‘tdi Agaronyan.

Yerevan va Armanistonning boshqa shaharlarida ommaviy mitinglar dushanba kuni, mamlakat sobiq prezidenti Serj Sargsyanning nomzodi bosh vazir lavozimiga ilgari surilgani tufayli boshlandi. Muxolifat bunga qarshi chiqdi. Politsiya o‘nlab namoyishchilarni qo‘lga oldi, ularning aksariyati keyinchalik qo‘yib yuborildi. Seshanba kuni Armaniston parlamenti Sargsyanni bosh vazir etib sayladi.

“Fuqarolik shartnomasi” muxolif partiya yetakchisi, parlament deputati Nikol Pashinyan Armanistonda “baxmal inqilobi” boshlangani haqida ma'lum qildi. Uning maqsadi – mamlakatda hokimiyatni o‘zgartirish. Pashinyan o‘zining barcha tarafdorlarini bo‘yin egmaslik bo‘yicha tinch aksiyalarni o‘tkazishga chaqirdi.

Tayyorlagan: Отабек Матназаров

#namoyish #Armaniston

Armanistonda sobiq prezident Serj Sargsyan bosh vazir bo‘lishiga qarshi norozilik namoyishlari boshlandi. Namoyishlar tashkilotchisi bu harakatlarni «Baxmal inqilob» deb atadi