Argentina prezidenti iqtisodiy inqiroz tufayli jahon chempionatiga bora olmaydi

Argentina prezidenti Maurisio Makri futbol bo‘yicha jahon chempionati vaqtida Rossiyaga o‘z mamlakatidagi iqtisodiy inqiroz tufayli tashrif buyura olmaydi.

«Jahon chempionatiga borish kerak emas. Rossiyaga hozirgi sharoitda yo‘l olish yuz foizlik mag‘lubiyat bo‘ladi, shu bilan birga, yirik hisobdagi mag‘lubiyat», - deya davlat rahbariga yaqin bo‘lgan manba so‘zlarini keltiradi La Nación.

«U (prezident) aniq bormaydi. Bunday vaziyatda bu hattoki ko‘rib ham chiqilmayapti», - deya qo‘shimcha qilib o‘tgan nashr suhbatdoshi.

Ta'kidlanishicha, bu masala bo‘yicha rasmiy ma'lumot hozircha berilmagan.

Eslatib o‘tamiz, avvalroq Rossiya mintaqalarida JCh-2018 vaqtida kabob pishirish taqiqlanishi xabar berilgandi.