Argentina AQSh ortidan JSSTdan chiqdi

Argentinaning Jahon sog‘liqni saqlash tashkiloti (JSST) a’zoligini to‘xtatish haqida bir yil avval qabul qilingan qarori kuchga kirdi, deb ma’lum qildi tashqi ishlar vaziri Kirno. Argentina JSSTdan chiqishini pandemiya davridagi harakatlariga qo‘shilmasligi bilan izohlagan edi.

Foto: Fabrice Coffrini/AFP

Argentina Jahon sog‘liqni saqlash tashkiloti (JSST) a’zoligini to‘xtatdi. Mamlakat tashqi ishlar vaziri Pablo Kirnoning aytishicha, bu qaror rasmiy xabarnoma yuborilganidan bir yil o‘tib, 17 mart, seshanba kuni kuchga kirgan.

Kirno X ijtimoiy tarmog‘ida shunday yozdi: “Mamlakatimiz sog‘liqni saqlash sohasidagi xalqaro hamkorlikka ikki tomonlama kelishuvlar va mintaqaviy forumlar orqali ko‘maklashishda davom etadi, shu bilan birga o‘z suverenitetini va sog‘liqni saqlash siyosati masalalari bo‘yicha qaror qabul qilish imkoniyatini to‘liq himoya qiladi”.

Bir yil avval Argentina hukumati BMT bosh kotibi Antoniu Guterrishga JSST tarkibidan chiqish niyati haqida xabar bergan edi. Mamlakat prezidenti Xaver Miley bu qadamni JSSTning Covid-19 pandemiyasi davrida olib borgan siyosatiga norozilik bilan asoslagan.

Shunga o‘xshash qarorni Argentinadan taxminan bir oy oldin AQSh prezidenti Donald Tramp ma’muriyati qabul qilgan edi va u yanvar oyi oxirida kuchga kirgan. Shu tariqa, Qo‘shma Shtatlar 1948 yilda tashkil etilgan va 190 dan ortiq a’zoga ega Jahon sog‘liqni saqlash tashkilotidan chiqqan birinchi mamlakatga aylandi. Tramp JSSTni korrupsiya, samarasizlik va Xitoy hamda boshqa davlatlarning siyosiy bosimiga yon bosishda ayblagan.

AQSh JSSTdan rasman chiqqanidan so‘ng tashkilot oldida 260 million dollar qarz qoldirgan. AQSh va Argentina qarorlari ortidan Jahon sog‘liqni saqlash tashkiloti rahbariyati xodimlar sonini qisqartirmoqda. Kutilishicha, joriy yil oxiriga qadar JSST xodimlarining 25 foizi ishdan bo‘shatiladi.