Isroil falastinliklarga Ramazonda Al-Qudsga kirishni taqiqladi

Isroil hukumati G‘azo sektorida istiqomat qiluvchilarga Ramazon oyida Al-Quds hududiga kirishni taqiqlab qo‘yish haqida qaror qabul qildi. Bu haqda «Izvestiya» gazetasi yozmoqda.

Nashr ma'lumotlariga ko‘ra, bu Isroil hamda G‘azo sektori chegarasidagi keskin vaziyat bilan bog‘liq. Al-Quds hududiga joriy yilda faqat G‘arbiy qirg‘oqda yashovchilar kiritiladi.

Ta'kidlanishicha, bu ma'lumotni Isroilning AQShdagi elchixonasidan ham tasdiqlashgan.

Shu bilan birga, Isroil odatda Ramazon oyida G‘azo sektorida yashovchilarni Al-Qudsga o‘tkazish tizimini soddalashtirib qo‘yardi.

Eslatib o‘tamiz, avvalroq Al-Quds ishlari bo‘yicha vazir Falastin bilan nizo qanday shartda to‘xtashini aytgandi.