Nig‘matulla Yo‘ldoshev Belarusga boradi

11-14 iyun kunlari O‘zbekiston Respublikasi Oliy Majlisi Senatining raisi Nig‘matulla Yo‘ldoshev boshchiligidagi O‘zbekiston Respublikasi parlamenti delegatsiyasi tashrif bilan Belarus Respublikasida bo‘ladi. Bu haqda O‘zbekiston Respublikasi Oliy Majlisi Senatining axborot xizmati xabar qilmoqda.

Tashrif doirasida ikki tomonlama munosabatlar hamda parlamentlararo hamkorlikni, savdo-iqtisodiy va investitsiyaviy loyihalarni amalga oshirish masalalari muhokama qilinishi mo‘ljallangan.

Shuningdek, O‘zbekiston Respublikasi Oliy Majlisi Senati va Belarus Respublikasi Milliy majlisi Respublika Kengashi o‘rtasida hamkorlik to‘g‘risidagi Memorandum imzolanishi, ikki mamlakat ishbilarmon doiralari vakillari ishtirokida davra suhbati o‘tkazilishi rejalashtirilgan.