Farg‘onada parashyutdan sakrash musobaqasi bo‘lib o‘tdi (foto)

Sharqiy harbiy okrug dala o‘quv maydonida XI parashyut sporti bo‘yicha ochiq musobaqasi o‘lib o‘tdi. Bu haqda Mudofaa vazirligi matbuot xizmati xabar bermoqda.  

Sakrashlar Mi-8 harbiy vertolyotidan salkam 3 ming metr balandlikdan amalga oshirildi. 

“Ushbu musobaqadan umidimiz katta. Asosiy maqsadimiz Qurolli Kuchlarimizda parashyut sportini ommalashtirish, professional parashyutchilarni yetishtirish va eng asosiysi, yoshlarimiz orasida havo-desant bo‘linmalarida xizmat qilishga bo‘lgan ishtiyoqni oshirishdan iborat”, — deydi harbiy okrug havo-desant xizmati boshlig‘i podpolkovnik Mardonbek Eshanov. 

3 kun davom etgan musobaqada aniqlikka parashyut bilan sakrash yo‘nalishi bo‘yicha 1-o‘rin kichik serjant Muzaffar Qahhorovga nasib etgan bo‘lsa, 2-o‘rinni Mixail Lenchenko, 3-o‘rinni katta serjant Altinboy Klyshov egalladi.

Jamoaviy tarkibda parashyut bilan aniqlikka sakrash yo‘nalishida 1-o‘rin O‘zbekiston Respublikasi parashyut sporti federatsiyasi “Aerosport” jamoasiga, 2-o‘rin Toshkent harbiy okrugi “Lochin” jamoasiga, 3-o‘rin esa Mudofaa vazirligi markaziy apparatining “Mergan” jamoasiga nasib etdi.  

Musobaqada jamoalarni tayyorlash bo‘yicha eng yaxshi murabbiy nomiga O‘zbekiston Respublikasi parashyut sporti federatsiyasi mutaxassisi Aleksey Borshchuk sazovor bo‘ldi.