Olib qochilgan ikkita “Neksiya” bir odamning uyidan topildi

Samarqand shahrida shu yil 14 iyul kuni noma'lum shaxs “Dahbedi” MFYda joylashgan “Shodiyona” savdo majmuasi oldida qarovsiz qoldirilgan Samarqand tumanida yashovchi U.K.ga tegishli kul rang “Neksiya” rusumli avtomashinasini haydab qochgan. Bu haqda O‘zbekiston Respublikasi IIV Jamoatchilik va ommaviy axborot vositalari bilan aloqalar boshqarmasi xabar bermoqda.

Ko‘rilgan choralar natijasida ushbu jinoyatni Jomboy tumanida yashovchi G‘.X. sodir etganligi aniqlanib, uning yashash uyidan “Neksiya” avtomashinasi texnik soz holda topilgan. 

Shuningdek, olib borilgan surishtiruv ishlari natijasida shu yil 26 iyul kuni Samarqand shahri “Shodiyona” savdo majmuasi oldida qarovsiz qoldirilgan fuqaro Z.B.ga tegishli bo‘lgan yana bir “Neksiya” rusumli avtomashinasini ham G‘.X. haydab qochgani ma'lum bo‘lgan va ushbu “Neksiya” ham uning yashash uyidan texnik soz holda topilgan. 

“Shu o‘rinda, o‘z fuqarolik burchini bajarib, mazkur o‘g‘irlik yuzasidan ichki ishlar organlari xodimlariga xabar bergan yurtdoshlarimizga o‘z minnatdorchiligimizni bildiramiz”, - deyiladi IIV xabarida.