Eronda 11 nafar terrorchi yo‘q qilindi

Eron islom inqilobi qo‘riqchilari korpusi (Eron qurolli kuchlari bo‘limi) G‘arbiy Ozarbayjon viloyatidagi Oshneviya shaharchasida 11 nafar jangarini yo‘q qilgani haqida xabar qildi.

"Kecha oqshomda xorijiy razvedka xizmatlari bilan aloqador qurollangan terrorchilar guruhi vaziyatni izdan chiqarish va qo‘poruvchilik harakatini amalga oshirish uchun Oshneviyadagi chegaradosh hududdan mamlakatga kirishga urindi, ammo Hamza Said al-Shohad bazasidagi piyoda qo‘shinlarning jasur jangchilari pistirmasiga duch keldi", — deyiladi xabarda.

Operatsiya davomida Eron islom inqilobi qo‘riqchilari korpusi bir necha jangarini yarador qilgan hamda ko‘plab miqdorda o‘q-dorilar va aloqa vositalarini qo‘lga kiritgan.

Avvalroq 20 iyul kuni mamlakat g‘arbidagi Kurdiston viloyatida jangarilarning hujumi oqibatida kamida o‘n nafar harbiy halok bo‘lgani xabar qilingandi.