Pekinda kuchli yomg‘irlar sababli 170ga yaqin sayyohlik obektlari yopildi

Pekin ma'muriyati kutilayotgan jala va favqulodda holat xavfi sababli poytaxtdagi 168ta tabiat va me'moriy sayyohlik maskanlarini vaqtinchalik yopdi. Bu haqda turizm bo‘yicha qo‘mita ma'lum qildi.

Pekinda noqulay ob-havoning "sariq" darajasi e'lon qilindi.

Shahar ma'muriyati aholi va mehmonlarni tog‘li hududlarga bormaslikka, daryo sohiliga yaqinlashmaslikka hamda avtomobillarni qiyalik va ko‘priklar ostiga qo‘ymaslikka chaqirdi.

Sinoptiklar yaqin 24 soat ichida Pekinning ayrim tumanlarida va qo‘shni viloyatlarda 300 millimetrgacha yog‘in yog‘ishini kutishmoqda.