Shahram G‘iyosov va Murodjon Ahmadaliyevning navbatdagi raqiblari ma'lum bo‘ldi

Boks bo‘yicha Rio Olimpiadasi sovrindori, jahon chempioni Shahram G‘iyosov navbatdagi jangini 17 avgust kuni (Toshkentda 18 avgust) o‘tkazadi. Bu haqda Milliy olimpiya qo‘mitasi axborot xizmati xabar bermoqda.

Qayd etilishicha, AQShning Kaliforniya shtatida bo‘lib o‘tadigan jangda hamyurtimizga ganalik Albert Mensa raqiblik qiladi.

Ma'lumot uchun, Shahram shu kungacha professional ringda uchta jang o‘tkazgan va ularning har uchalasida g‘alaba qozongan (2tasi nokaut bilan). Afrikalik bokschi esa 38ta jang o‘tkazib, ularning 31tasida g‘olib bo‘lgan (15tasida raqiblarini nokautga uchratgan). Oltita jangda mag‘lubiyatga uchragan bo‘lsa, bitta bahsda durangga erishgan.

Shuningdek, boks bo‘yicha Olimpiya o‘yinlari va jahon chempionati sovrindori Murodjon Ahmadaliyevning navbatdagi raqibi va jang sanasi ham ma'lum bo‘ldi.

Unga ko‘ra, hamyurtimiz 23 avgust kuni AQShning Los-Anjyeles shahrida chililik Ramon Kontrerasga qarshi ringga ko‘tariladi.

Ma'lumot uchun, Ahmadaliyev bungacha uchta jang o‘tkazib, ularning barchasida g‘alaba qozongan (2tasi nokaut bilan). Kontreras esa prof ringda 21 marotaba ringga ko‘tarilib, ularning 15tasida g‘olib bo‘lgan (6tasi nokaut bilan). 6ta jangda esa mag‘lubiyat alamini totib ko‘rgan (5tasi nokaut bilan).