Jakartada Osiyo olimpiya kengashining bosh assambleyasi bo‘lib o‘tdi

Bugun, 19 avgust kuni Indoneziya poytaxti Jakarta shahrida Osiyo olimpiya kengashining 37-bosh assambleyasi bo‘lib o‘tdi. Unda Indoneziyada o‘tkazilayotgan Osiyo o‘yinlariga tashrif buyurgan delegatsiyalar rahbarlari, shuningdek, turli sport turlari bo‘yicha federatsiyalari rahbarlari ishtirok etishdi.

Assambleyani Osiyo olimpiya kengashi prezidenti shayx Ahmad al-Fahad al-Ahmad al-Saboh ochib berdi va ma'ruza qildi.

Assambleyada O‘zbekiston nomidan Milliy olimpiya qo‘mitasi bosh kotibi Jasur Matchanov qatnashdi.

Shuningdek yig‘ilishda yana bir necha o‘zbekistonlik sport amaldorlari, xususan, Osiyo Olimpiya Kengashi vitse-prezidenti, Xalqaro havaskor boks assotsiatsiyasi (AIBA) prezidenti vazifasini bajaruvchi G‘ofur Rahimov va Osiyo sambo ittifoqi prezidenti Alamjon Mullayev ham ishtirok etgan.

Assambleyaning ikkinchi qismiga O‘zbekiston Milliy Olimpiya qo‘mitasi prezidenti Umid Ahmadjonov ham yetib kelgan.

U Olimpiya kengashi prezidenti shayx Ahmad al-Fahad hamda AIBA rahbari G‘ofur Rahimov bilan ham uchrashgan. 

«Kun.uz» muxbiri xabar berishicha, assambleyada 2022 yili Xitoyning Hangjou shahri mezbonlik qiladigan Osiyo o‘yinlari va 2026 yili Yaponiyaning Ayti-Nagoya prefekturasida bo‘lib o‘tadigan Osiyo o‘yinlari, 2020 yilgi Tokio yozgi olimpiadasi va 2022 yilgi Pekin qishki olimpiadasi taqdimoti o‘tkazilgan, shuningdek, turli federatsiyalar rahbarlari taqdirlangan.

Shuningdek, assambleya davomida sportning yangi turi - tekbol sporti taqdimoti ham o‘tkazilgan. Ayni vaqtda ushbu sport turi bo‘yicha maxsus sayt faoliyat boshlagan.