Toshkent shahar IIBB boshlig‘ining birinchi o‘rinbosari Doniyor Toshxo‘jayev jinoyatchilikka qarshi reydlar yuzasidan 12 dekabr kuni bo‘lib o‘tgan matbuot anjumanida tadbirkor G‘ofur Rahimov qidiruvga berilgani haqidagi mish-mishlarni rad etdi.
Shu bilan birga, Toshxo‘jayev jurnalist bergan savolning “unga nisbatan tekshiruv olib borilyaptimi”, degan qismini javobsiz qoldirdi.
“Endi, aldoqchi bo‘lib qolmay, ish olib borilyaptimi, olib borilmayaptimi, degan joyini tushirib o‘tib ketsak. Bizda hozirgi vaqtda u shaxsga nisbatan jinoyat ishi mavjud emas. U shaxs keltirilmagan, qidiruvga e’lon qilinmagan”, – dedi IIBB rasmiysi.
Ushbu taniqli tadbirkor qidiruvga berilgani haqidagi xabarlarni avvalroq Kun.uz manbasi tasdiqlamagan edi.
Ma’lumot uchun, O‘zbekiston Bosh prokuraturasi 2018 yil iyulda G‘ofur Rahimovni qidiruvdagi shaxslar ro‘yxatidan chiqargan. U 2012 yildan buyon AQSh Moliya vazirligining sanksion ro‘yxatida qolmoqda. Tadbirkor Amerika rasmiylarining o‘ziga qarshi ayblovlariga “to‘qib chiqarilgan va siyosiy motivlarga ega yolg‘onga asoslangan” deya munosabat bildirgan.
72 yoshli G‘ofur Rahimov 2022 yil aprelida O‘zbekiston professional boks federatsiyasi birinchi vitse-prezidenti etib saylangan.
