Lavrov: AQSh IShID yordamida Suriya rejimini o‘zgartirmoqchi

Rossiya tashqi ishlar vaziri Sergey Lavrovning ma'lum qilishicha, IShID terrorchilik tashkiloti Suriyadagi siyosiy rejimni o‘zgartirish bo‘yicha vazifada AQSh ittifoqchisi sanaladi. Bu haqda TASS xabar bermoqda.

Uning bildirishicha, kuni kecha AQSh Davlat departamenti IShID hozircha mag‘lub etilmagani hamda uni bartaraf etish uchun avval Suriyadagi rejimni o‘zgartirish zarurligi haqida ma'lum qilgandi.

«Mening IShID amerikaliklar tomonidan Suriyadagi harbiy ishtirokni oqlash sifatida ko‘rilayotgani va Suriya rejimiga qarshi kurashda deyarli ittifoqdosh ekani haqidagi taxminim tasdiqlanmoqda», - deya xulosa qildi Lavrov.

Vazirning qayd etishicha, Amerika Qo‘shma Shtatlari uchun hozirgi paytdagi asosiy vazifa - IShIDni mag‘lub etish emas, balki Suriyadagi rejimni o‘zgartirish.

Eslatib o‘tamiz, avvalroq Rossiyaning Suriya uzra «himoya soyaboni» Isroil rejalarini murakkablashtirishi xabar berilgandi.