Afg‘oniston prezidenti O‘zbekistonga minnatdorchilik izhor etdi

Afg‘oniston bo‘yicha xalqaro konferensiyada ishtirok etayotgan O‘zbekiston Respublikasi tashqi ishlar vaziri Abdulaziz Komilov 2018 yilning 28 noyabr kuni Jyeneva shahrida Afg‘oniston Islom Respublikasi prezidenti Muhammad Ashraf G‘ani bilan uchrashdi.

TIV xabariga ko‘ra, suhbat chog‘ida O‘zbekiston bilan Afg‘oniston o‘rtasidagi munosabatlarning hozirgi holati va ularni kengaytirishning istiqbollari muhokama qilindi.

Bugungi kunda ikki davlat prezidentlarining rahbarligi ostida va shaxsan ishtiroki natijasida ko‘p qirrali va o‘suvchan ahamiyat kasb etib borayotgan O‘zbekiston – Afg‘oniston muloqotining izchil rivojlanayotgani e'tirof etildi, deyiladi xabarda.

Muhammad Ashraf G‘ani O‘zbekistonning Afg‘onistondagi tinchlik va hamjihatlikka ko‘maklashish borasidagi sa'y-harakatlarini yuqori baholadi hamda mamlakatdagi yirik infrastruktura va ijtimoiy-iqtisodiy loyihalarni amalga oshirishdagi qo‘llab-quvvatlash va ishtirok uchun minnatdorchilik izhor etdi.

Uchrashuvda tomonlarni qiziqtirgan boshqa masalalar ham ko‘rib chiqilgan.