Jyenevada Afg‘oniston bo‘yicha xalqaro konferensiya ochilmoqda. Nimalar kutilyapti?

70ga yaqin davlat vakillari Afg‘onistondagi vaziyatni BMT shafeligida Jyenevada seshanba kuni ochilayotgan ikki kunlik vazirlar konferensiyasida muhokama qiladilar. Forumda O‘zbekiston tashqi ishlar vaziri Abdulaziz Komilov ishtirok etadi.

BMTdan ta'kidlashlaricha, ushbu munozara jahon hamjamiyatiga tinchlik va farovonlikka erishish yo‘lida afg‘on xalqi bilan birdamlikni, Afg‘oniston hukumatiga esa - tinchlik hamda islohotlarga sodiqlikni yana bir bor tasdiqlash imkonini beradi. Konferentsiyada hukumat delegatsiyalaridan tashqari, nodavlat va xalqaro tashkilotlar, shuningdek, ekspertlar ishtirok etadi, Qo‘shma bayonot qabul qilinadi.

Gumanitar tashkilotlar Jyeneva forumiga katta ahamiyat bermoqda. «Agar men afg‘on bo‘lganimda, unda siyosiy yechimni kutgan bo‘lardim, sababi bunday qarorsiz odamlar azob chekishda davom etadi», - deydi Qizil Xoch Xalqaro qo‘mitasining operativ faoliyat boshqarmasi direktori Dominik Shtilxart. Biroq, uning aniqlik kiritishicha, siyosiy yechim nafaqat mahalliy darajada, balki mintaqaviy va xalqaro miqyosda ham kelishuvlarga erishishni talab qiladi.

«Tarixan mintaqaviy va xalqaro o‘yinchilar Afg‘oniston qanday bo‘lishi kerakligi haqida kelisha olmaganlar. Men Jyenevada bo‘lib o‘tadigan uchrashuvda afg‘onlar manfaati birinchi o‘ringa ko‘tarilishini xohlayman», - dedi Shtilxart.

O‘z navbatida, BMTning Afg‘onistondagi insonparvarlik yordami bo‘yicha muvofiqlashtiruvchisi Tobi Lanzerning jurnalistlarga ma'lum qilishicha, hozirgi vaqtda mamlakatdagi vaziyat tinchlikka erishish yo‘lini avvalgidan ko‘ra ko‘proq topishga ko‘maklashadi. «Afg‘onistonda yangi imkoniyatlar mavjud va tinchlik uchun juda ko‘p umidlar bor», - dedi u. 

Forumning birinchi kuni ekspertlar darajasida bahslarga bag‘ishlangan bo‘lib, 28 noyabr kuni Afg‘onistondagi vaziyatni vazirlar darajasida muhokama qilish rejalashtirilmoqda. Kutilishicha, forum birinchi kuni ekspertlar darajasidagi muhokamalarga bag‘ishlanadi, 28 noyabrda esa vazirlar darajasida Afg‘onistondagi vaziyat ko‘rib chiqiladi. Dasturda Afg‘oniston prezidenti Ashraf G‘ani, bosh vazir Abdulla Abdulla, tashqi ishlar vaziri va mamlakat moliya vaziri so‘zga chiqadi. Oliy darajadagi segment 28 noyabr kuni Shveytsariya tashqi ishlar vaziri Ignatsio Kassis tomonidan ochiladi. Forumda BMT bosh kotibining siyosiy masalalar bo‘yicha o‘rinbosari Rozmari Di Karlo, BMT bosh kotibining Afg‘onistondagi maxsus vakili Tadamiti Yamamoto va Jahon banki vitse-prezidenti Xart Shafer ishtirok etadi.