AQSh davlat kotibining Afg‘oniston bo‘yicha maxsus vakili O‘zbekistonga keladi

AQShning Afg‘oniston bo‘yicha maxsus vakili Zalmay Halilzod 2-20 dekabr kunlari qator mamlakatlarga, jumladan, O‘zbekistonga tashrif buyuradi. Bu haqda Qo‘shma Shtatlar Davlat departamenti xabar qilgan.

«Afg‘on sulhi bo‘yicha maxsus vakil, elchi Zalmay Halilzod 2-20 dekabr kunlari idoralararo delegatsiya bilan Pokiston, Afg‘oniston, Rossiya, O‘zbekiston, Turkmaniston, Belgiya, Birlashgan Arab Amirliklari va Qatarga tashrif buyuradi», - deyiladi Davlat departamentining xabarida. U RIA Novosti tomonidan keltirilgan.

Ta'kidlanishicha, tashrif chog‘ida Halilzod «afg‘on hukumati va boshqa manfaatdor tomonlar vakillari bilan Afg‘onistonda inklyuziv tinchlik jarayonni qo‘llab-quvvatlash hamda ilgari surish uchun uchrashadi». Mamlakat prezidenti bilan muzokaralar o‘tkazish rejalashtirilgan.

Eslatib o‘tamiz, avvalroq Afg‘oniston prezidenti O‘zbekistonga minnatdorchilik izhor etgandi.