«Yuventus» Azarni «Real»dan ilib ketmoqchi: Londonga taklif xati yuborildi

«Chelsi» vingeri Eden Azar uchun endilikda «Yuventus» ham da'vogarlik qilmoqda. Bu haqda The Telegraph xabar tarqatgan.

Nashr ma'lumotiga ko‘ra, Turin klubi bu yo‘ldagi raqobatchilarini dog‘da qolishni istamoqda, shu boisdan 27 yoshli belgiyalik transferi masalasida allaqachon Londonga taklif jo‘natgan.

Eslatib o‘tamiz, hozirga qadar Azar uchun yaqqol favorit sifatida «Real» ko‘rsatib kelinadi. Xavbekning o‘zi ham Madridga yo‘l olish orzusi borligini qayta-qayta ta'kidlagan, kuni kecha «qirollik klubi» taklifiga rozi ekani ma'lum bo‘lgandi.

Matbuotda «Yuve»ning «Real»da ishlari yurishmayotgan yarimhimoyachi Iskoga ham befarq qaramayotgani haqida xabarlar bor. Ispanlar yozda Iskoni Italiya chempioni safiga qo‘yib yuborib, uning o‘rnini Azar bilan to‘ldirishni mo‘ljallashmoqda.