NATO bosh kotibi Yyens Stoltenberg alyansning eshiklari Gruziya va boshqa nomzodlarga ochiq ekanligini aytdi.
Stoltenberg bu haqida Makedoniyaning alyansga kirishi haqidagi bayonnomaning ratifikatsiyasidan keyin aytgan. Makedoniya NATOga kirish uchun nomini “Shimoliy Makedoniya”ga o‘zgartirishgacha bordi.
Stoltenberg Gruziyaga barcha mezonlarni bajarishi, islohotlarni amalga oshirishi va Abxaziya hamda Janubiy Osetiya masalasini hal qilishi lozimligini eslatib o‘tgan.
“NATO eshiklari Gruziya kirishi uchun barcha mezonlarni bajarganda ochiq qoladi. Bugungi voqea Gruziya uchun kuchli signal bo‘lishi lozim”, deb aytgan bosh kotib.
Shimoliy Makedoniyaning NATOga kirishi bayonnomasi alyansning barcha davlatlari tomonidan Bryusseldagi uchrashuvda ratifikatsiya qilindi. Ushbu davlat byurokratik jarayonlar davom etguncha yig‘ilishlarda taklif qilingan davlat kabi ishtirok etib turadi.
