OAV Turkmaniston prezidentining onasi og‘ir ahvoldaligini ma'lum qildi 

Turkmaniston prezidenti Gurbanguli Berdimuhamedovning onasi shifoxonaga tushib qolgani sababli Turkiyadan Turkmanistonga shifokorlar brigadasi jo‘nadi. Bu haqda Turkiyaning Daily Sabah nashri xabar berdi.

10 nafar turkiyalik shifokordan iborat brigada Ashxobodga 22 may ertalab yo‘l olgan. Ma'lum qilinishicha, prezident onasi – Ogulabat Berdimuhamedova o‘pkani sun'iy shamollatish qurilmasiga ulangan.

“Xroniki Turkmenistana” nashrining xabar berishicha, turkiyalik shifokorlar orasida Istanbuldan 7 nafar professor, taniqli anesteziolog-reanimatolog va jismoniy reabilitatsiya maxsus markazi shifokori bor.

O‘z navbatida Turkmen Yurt TV nashrining xabar berishicha, prezident onasi juda og‘ir ahvolda bo‘lib, yoshi keksaligi va surunkali kasalliklari sababli shifokorlar  kuzatuvida bo‘lgan.

Nashr manbalarining ta'kidlashicha, ayolga uchinchi darajadagi gipertonik kasallik, miya qon aylanishi buzilishi, gipertonik kriz, gemorragik insult, ikkinchi darajali koma, etsefalopatiya, yurak ishemik kasalligi, stenokardiya, miya shishi, surunkali xoletsistit, o‘tkir buyrak yetishmovchiligi, yurak-o‘pka yetishmovchiligi kabi tashxislar qo‘yilgan.