Deutsche Bank Venesuelaning 20 tonna oltinini musodara qildi – OAV

Foto: EPA

Germaniyaning Deutsche Bank banki Venesuelaning 20 tonna oltinini musodara qildi. Bu haqda vaziyatdan xabardor manbalarga iqtibos keltirgan holda Bloomberg axborot agentligi xabar berdi.

2016 yilda Venesuela bankdan 750 mln dollar miqdorida kredit olib, garov sifatida bankka 20 tonna oltin bergan. Kreditni qaytarish muddati 2021 yilda yakunlanishi kerak bo‘lgan, biroq Karakas kelishuv shartlarini bajarmay, foiz to‘lovlarini amalga oshirmagan. Shu sababli bank garovga qo‘yilgan oltinni musodara qilishga qaror qilgan.

Agentlik ma'lumotlariga ko‘ra, Venesuela muxolifati vakillari bank bilan muzokaralar olib bormoqdalar va qo‘shimcha 120 mln dollar to‘lashni so‘rashmoqda. Siyosatchilarning fikricha, ushbu summa kredit bilan oltin narxidagi farqni qoplaydi. Muxolifat bu pulni amaldagi prezident Nikolas Maduro kira olmaydigan alohida hisobraqamiga o‘tkazilishini istamoqda.

Ta'kidlanishicha, nemis banki va Venesuela markaziy banki vakillari vaziyatga izoh berishdan bosh tortishgan.

Tayyorlagan: Шуҳрат Раҳимов

#Venesuela #oltin #Deutsche Bank

Venesuela prezident Nikolas Maduroga qarshi ommaviy norozilik namoyishlari girdobida qoldi. 23 yanvar kuni, ushbu namoyishlar avjiga chiqqan vaqtda Venesuela parlamenti rahbari Xuan Guaydo o‘zini mamlakatning muvaqqat prezidenti deb e’lon qildi