Sudanda yangi bosh vazir tayinlandi 

Sudanda o‘tish hukumati rahbari etib Abdulla Hamdo‘k tayinlandi. U 39 oy davomida hukumatga rahbarlik qiladi. Bu haqda Al Arabiya telekanali  xabar berdi.  

Ta'kidlanishicha, Hamdo‘k ko‘plab yillar davomida BMTning Addis-Abebedagi tuzilmalarida yuqori lavozimda ishlab kelgan. U Sudanga bosh vazir etib tayinlanishidan biroz oldin qaytgan.

21 avgustda Sudanda mamlakatni keyingi saylovlargacha 3 yil boshqarishi kerak bo‘ladigan suveren kengashning barcha 11 a'zosi qasamyod keltirdi.

Kengashga 5 harbiy va 6 fuqaro shaxsi kirgan. 21 oy davomida kengashga general Abdulfattoh al-Burxon boshchilik qiladi. Qolgan 18 oy uni fuqaro shaxsi boshqaradi.

Sudanda harbiy to‘ntaruv yuz berib, sobiq prezident Umar al-Bashir hokimiyatdan chetlatilgandan keyin mamlakatni harbiy kengash boshqarib kelayotgandi. Bu esa harbiylarning yakkahokimligiga qarshi noroziliklar keltirib chiqargan. Natijada harbiylar muxolif koalitsiya bilan bitim tuzishgan. Hujjatda mamlakatda harbiy-fuqarolik suveren kengashi shakllantirish haqidagi band ham bo‘lgan. 

Suveren kengash tashkil etilishi mamlakatga siyosiy inqirozdan chiqishga va noroziliklarga chek qo‘yishga yordam berishi kutilmoqda.