Sudanda bog‘chaga hujumdan so‘ng o‘nlab bolalar halok bo‘ldi

Sudanda harbiylashgan qurolli guruhlar tomonidan dronlar qo‘llangan hujumlar natijasida, o‘nlab tinch aholi, jumladan, bolalar ham halok bo‘ldi. Janubiy Kordofan provinsiyasida bolalar bog‘chasi va shifoxona o‘qqa tutilgani haqida yakshanba, 7 dekabr kuni Kalouga ma’muriyati rahbari AFP agentligiga xabar berdi.

BMTning Bolalar jamg‘armasi — YUNISEF 5 dekabr kuni aniqlik kiritishicha, halok bo‘lganlar orasida 5 yoshdan 7 yoshgacha bo‘lgan 10 dan ortiq bola bor. Sudan tashqi ishlar vazirligi esa bu aholi punktida 43 bola va jami 79 kishi halok bo‘lganini ma’lum qildi.

Ma’muriyat rahbari hujumlarda Tezkor reaksiya bildirish kuchlari (RSF — Rapid Support Forces) va ular bilan bog‘liq, Janubiy Kordofanning katta qismini nazorat qiladigan SPLM-N isyonchi guruhini aybladi. Uning so‘zlariga ko‘ra, avval bolalar bog‘chasi, so‘ng shifoxona, undan keyin esa “bolalarni xavfsiz joyga olib chiqishni istagan” aholi zarba ostida qolgan.

«Maktabda (bog‘chada) bolalarni o‘ldirish — bolalar huquqlarining dahshatli buzilishi», — dedi Sudandagi YUNISEF vakili Sheldon Yyett. «Bolalar hech qachon mojaro narxini to‘lamasligi kerak. YUNISEF barcha tomonlarni darhol bu hujumlarni to‘xtatishga va insonparvarlik yordamiga muhtoj bo‘lganlarga xavfsiz va to‘sqinliksiz yetib borish imkoniyatini ta’minlashga chaqiradi», — deya qo‘shimcha qildi u.

Jamg‘arma ma’lumotlariga ko‘ra, o‘tgan bir oy davomida shimoliy va janubiy Kordofanda zo‘ravonlik kuchayishi natijasida 41 000 dan ortiq odam uy-joyini tashlab qochishga majbur bo‘lgan.

2023 yil aprel oyi o‘rtalarida kurashlar yangi bosqichga o‘tganidan beri Sudan eng og‘ir gumanitar fojialardan birini boshdan kechirmoqda. Kuzda Shimoliy Darfur provinsiyasidagi Al-Fasher shahrini Tezkor reaksiya bildirish kuchlari (RSF) isyonchi guruhi qo‘lga kiritgandan so‘ng, u yerda fuqarolik aholisiga nisbatan ommaviy qirgin va shafqatsizliklar sodir etilgan.

Mojaroning keskinlashuvi RSF va Sudanning muntazam armiyasi — SAF o‘rtasida RSF bo‘linmalarini qurolli kuchlar tarkibiga qo‘shish shartlari borasida kelishuvga erisha olinmaganidan keyin boshlandi. Insonparvarlik tashkilotlari va BMT ma’lumotlariga ko‘ra, mojaro boshlanganidan beri 140 mingdan ortiq kishi halok bo‘lgan. Sudanning taxminan 51 millionlik aholisining yarmisi chet el gumanitar yordamiga muhtoj holda yashamoqda.