Indoneziya yangi poytaxtini junglilarda quradi

Indoneziya prezidenti Joko Vidodo yangi poytaxtning Kalimantan (Borneo oroli) junglilarida qurilishini e'lon qildi. Bu haqda Lonely Planet nashri ma'lum qildi.

Indoneziya rahbariyati hozirgi poytaxt Jakarta ekologik va iqtisodiy muammolarga uchrayotgani sababli poytaxtni boshqa joyga ko‘chirishga qaror qilgandi. Hozirda shaharning bir qismi har yili 10 santimetrga cho‘kib bormoqda va toshqinlar yuz berishi xavfi mavjud.

Ma'lum qilinishicha, yangi poytaxt joylashadigan hududda zilzila, sunami, ko‘chki va vulqon otilishlari kabi tabiiy ofatlar yuz berishi xavfi kam. Biroq hudud o‘rmon yong‘inlarida qolishi xavfi mavjud.

Ba'zi ekologik tashkilotlar yangi poytaxt tabiatga ziyon yetkazishi mumkin deb hisoblashmoqda. Atrof-muhitni muhofaza qilish departamenti loyihani ekologik baholash ustida ish olib bormoqda va uni noyabrgacha yakunlashga umid qilmoqda. Agar loyiha ma'qullansa, yangi poytaxt qurilishi 2021 yilda boshlanadi.

Yangi poytaxt qurilishi 33 mlrd dollarga baholanmoqda. Hozircha unga nom ham tanlanmagan.