Erdo‘g‘an Suriyada "Tinchlik bulog‘i" operatsiyasi davom etishi mumkinligini aytdi

Uning so‘zlariga ko‘ra, "oxirgi terrorchi mintaqani tark etmagunicha" Turkiya bu fikridan qaytmaydi.

Turkiya prezidenti Rajab Toyyib Erdo‘g‘an Turkiyaning Suriyadagi "Tinchlik bulog‘i" operatsiyasi davom etishi mumkinligini istisno qilmadi. 

"Shubhasiz. Oxirgi terrorchi mintaqani tark etmagunicha bu ishni to‘xtatmaymiz. Suriyadan boshqa davlatlar chiqib ketmagunicha biz u yerni tark etmaymiz. Biz Suriyaning hududiy yaxlitligi va birligini qo‘llab-quvvatlaymiz", - dedi Erdo‘g‘an jurnalist savoliga javoban.

Shu bilan birga, Turkiya rahbari Anqara Suriyaning "bo‘linib ketishini xohlamasligini" ta'kidladi. 

U Turkiya Adana kelishuviga asosan operatsiya o‘tkazishga haqli ekanligini aytdi.

"Agarda mintaqa terrorchi tashkilotlardan tozalanmaydigan bo‘lsa, biz Adana kelishuvi doirasida operatsiyani davom ettiramiz", - dedi Erdo‘g‘an.