Xitoy O‘zbekistonning Afg‘onistonda siyosiy muzokaralar jarayonini boshlash borasidagi sa'y-harakatlarini yuqori baholadi
2020 yilning 27 fevral kuni O‘zbekiston Respublikasi prezidentining Afg‘oniston bo‘yicha maxsus vakili Ismatulla Ergashev Xitoy Xalq Respublikasining favqulodda va muxtor elchisi Tszyan Yan bilan uchrashdi.
TIV xabariga ko‘ra, suhbat chog‘ida O‘zbekiston va Xitoyning Afg‘oniston muammosini hal etishdagi sa'y-harakatlari, Afg‘onistonda turli loyihalarni amalga oshirishdagi O‘zbekiston-Xitoy hamkorligining ustuvor yo‘nalishlari muhokama qilindi.
Xitoy tomoni O‘zbekistonning Afg‘onistonda siyosiy muzokaralar jarayonini boshlash borasidagi sa'y-harakatlarini yuqori baholar ekan, Xitoyning Afg‘oniston inqirozini tinch yo‘l bilan hal qilish tarafdori ekanligini yana bir bor tasdiqladi.
Elchi Afg‘onistonni mintaqaviy loyihalarga yanada jalb etish muhimligi to‘g‘risidagi O‘zbekiston tomoni fikrini to‘liq qo‘llab-quvvatladi, bu esa mamlakatdagi vaziyatni hal etish va uning ijtimoiy-iqtisodiy infratuzilmasini tiklashga yordam beradi.
Suhbat davomida elchi Termiz shahridagi Afg‘oniston fuqarolarini o‘qitish bo‘yicha Ta'lim markazida afg‘on agrar mutaxassislarini tayyorlash bo‘yicha uch tomonlama hamkorlikni faol qo‘llab-quvvatlagani uchun O‘zbekiston Tashqi ishlar vazirligiga minnatdorlik bildirdi.
Ta'kidlanganidek, joriy yilning ikkinchi yarmida o‘tkazilishi rejalashtirilgan «Afg‘onistonning tibbiyot sohasi uchun hamshiralar tayyorlash» mavzusidagi kurslar ushbu mamlakatning ijtimoiy-iqtisodiy infratuzilmasini tiklashda amaliy yordam ko‘rsatadi.