Kuz-qish mavsumida virus xavfi oshadimi? – ekspert izohi

Jumladan, savollardan birida “Vrachlarimizdan koronavirus bo‘lgan insonlarda qon quyuqlashadi deb eshitmoqdamiz, shu qanchalik to‘g‘ri?” – deya so‘ralgan.

“Koronavirus qon tomirlarning ichki yuzasini qoplovchi hujayralarni zararlashi mumkinligi to‘g‘risida ma'lumotlar ko‘payib bormoqda. Bunda tomir va kapillyarlarda mahalliy yallig‘lanish yuzaga keladi. Bugungi kunda ushbu virus avval boshdanoq hayot uchun muhim bo‘lgan a'zolarning mayda kalibrdagi tomirlarida gemostazni faollab, tromb hosil qilish va tomir ichida qonning quyuqlashishida o‘rni borligini tasdiqlash mumkin. Bunda nafaqat o‘pka zararlanadi, balki mikrosirkulyatsiyaning qamali ham kuzatiladi. Bularning barchasi kasallikning oqibatini aniqlashtiradi”, deya javob berdi Nargiza Nurullayeva. 

Bundan tashqari ekspert yana boshqa savollarga ham javob berib o‘tdi:

“Bilamizki kuz va qish fasli yaqinlashmoqda, ushbu mavsumlarda koronavirus og‘ir kechishi mumkinmi, vaziyat qanday bo‘ladi?”

–Dunyodagi statistik ma'lumotlarga asoslanadigan bo‘lsak, har yili mavsumiy gripp va yuqori nafas yo‘llari kasalliklari bu fasllarda ko‘p uchraydi. Mavsumiy gripp – bu odamdan odamga o‘tuvchi, butun dunyo bo‘ylab uchraydigan o‘tkir virusli infeksiya hisoblanadi. Ko‘p insonlar tibbiy yordamsiz bu kasallikdan to‘liq sog‘ayib ketadi. Qish mavsumida o‘tkir respirator kasalliklar fonida koronavirus infeksiyasini qo‘shilishi kasallanish darajasini albatta oshiradi. Lekin bizda bugun davolash mezonlari ishlab chiqilgan va ishonchimiz komil bo‘lishi kerakki bizning fuqarolarimiz koronavirusga qarshi choralarni susaytirmasdan bajarishda davom etishadi.