Toshkentda YTH oqibatida tez yordam mashinasi ag‘darilib ketdi

Shayxontohur tumanida sodir bo‘lgan YTH haqida ma'lumot berildi.

Joriy yilning 21 avgust kuni taxminan soat 16:30da Kichik halqa avtomobil yo‘lidagi Gulzor chorrahasida yo‘l-transport hodisasi sodir bo‘ldi. Bu haqda poytaxt IIBB xabar bermoqda.

Tez yordam avtomobili haydovchisi, 53 yoshli G.B. svetoforning taqiqlovchi belgisi ostida harakatlanib, 40 yoshli N.N. boshqaruvidagi Spark rusumli avtomobilga to‘qnashgan.

YTH oqibatida tez yordam mashinasi ag‘darilgan, haydovchisi badan shikastlari bilan shifoxonaga yetkazilgan. Shuningdek, «tez yordam» yo‘lovchisi, 29 yoshli hamshira X.A.ga ham badan shikastlari yetgan.

Spark avtomobili haydovchisining so‘zlariga ko‘ra, tez yordam mashinasining maxsus tovush va yorug‘lik signallari yoqilmagan bo‘lgan.

Tekshiruv davom etmoqda, deyiladi ma'lumotda.