Braziliyada Xitoy vaksinasi sinovlari “jiddiy hodisa”dan keyin to‘xtatildi

Braziliyaning sog‘liqni saqlash tizimini nazorat qiluvchi agentligi Anvisa Xitoyning “Sinovac” kompaniyasining koronavirusga qarshi “Coronavac” vaksinasi sinovlarini “jiddiy hodisa”dan keyin vaqtincha to‘xtatishga qaror qildi.

Foto: Reuters

Xabarda ta'kidlanishicha, vaksinaning odamlardagi sinovlari “jiddiy nojo‘ya ta'sir” sababli to‘xtatilgan. Anvisa sinovlarda ishtirok etayotgan ko‘ngillilardan birida nojo‘ya ta'sir qayd qilinganidan 29 oktyabrda xabardor qilingan va tadqiqotni olingan ma'lumotlarni baholash uchun to‘xtatib turishga qaror qilgan.

Sinovlarni nazorat qilayotgan Butantan instituti rahbari Dimas Kovas ma'lumotlariga ko‘ra, tadqiqotning to‘xtatilishiga ko‘ngillilardan birining o‘limi sabab bo‘lgan. Biroq Kovasning ta'kidlashicha, ushbu o‘lim vaksina sinovlari bilan bog‘lanmagan.

“Biz Anvisa’ni “jiddiy nojo‘ya ta'sir”dan emas, o‘lim yuz berganidan xabardor qilgandik. Biz Anvisa’ning ushbu qaroridan biroz taajjubdamiz, chunki o‘lim vaksina sinovi bilan bog‘lanmagan”, deb aytgan Kovas.

Anvisa Braziliyada 4 ta vaksinaning klinik sinovlariga ruxsat bergan, bular: “Sinovac”, “AstraZeneca”, “Pfizer” va “Johnson & Johnson”ning farmatsevtika bo‘linmasi “Janssen-Cilag” vaksinalari.

“Jiddiy hodisalar”ga o‘lim yoki nogironlikka, shifoxonaga yotqizishga olib kelishi mumkin bo‘lgan nojo‘ya ta'sirlar, infeksiyaning tibbiy qurilma orqali yuqishi yoki boshqa ahamiyatli hodisalar kiradi.