Бразилияда Хитой вакцинаси синовлари “жиддий ҳодиса”дан кейин тўхтатилди

Бразилиянинг соғлиқни сақлаш тизимини назорат қилувчи агентлиги Anvisa Хитойнинг “Sinovac” компаниясининг коронавирусга қарши “Coronavac” вакцинаси синовларини “жиддий ҳодиса”дан кейин вақтинча тўхтатишга қарор қилди.

Фото: Reuters

Хабарда таъкидланишича, вакцинанинг одамлардаги синовлари “жиддий ножўя таъсир” сабабли тўхтатилган. Anvisa синовларда иштирок этаётган кўнгиллилардан бирида ножўя таъсир қайд қилинганидан 29 октябрда хабардор қилинган ва тадқиқотни олинган маълумотларни баҳолаш учун тўхтатиб туришга қарор қилган.

Синовларни назорат қилаётган Бутантан институти раҳбари Димас Ковас маълумотларига кўра, тадқиқотнинг тўхтатилишига кўнгиллилардан бирининг ўлими сабаб бўлган. Бироқ Коваснинг таъкидлашича, ушбу ўлим вакцина синовлари билан боғланмаган.

“Биз Anvisa’ни “жиддий ножўя таъсир”дан эмас, ўлим юз берганидан хабардор қилгандик. Биз Anvisa’нинг ушбу қароридан бироз таажжубдамиз, чунки ўлим вакцина синови билан боғланмаган”, деб айтган Ковас.

Anvisa Бразилияда 4 та вакцинанинг клиник синовларига рухсат берган, булар: “Sinovac”, “AstraZeneca”, “Pfizer” ва “Johnson & Johnson”нинг фармацевтика бўлинмаси “Janssen-Cilag” вакциналари.

“Жиддий ҳодисалар”га ўлим ёки ногиронликка, шифохонага ётқизишга олиб келиши мумкин бўлган ножўя таъсирлар, инфекциянинг тиббий қурилма орқали юқиши ёки бошқа аҳамиятли ҳодисалар киради.