BAA kompaniyasi Dubay va Tel-Aviv o‘rtasida tijorat reyslarini boshladi

Isroil va Birlashgan Arab Amirliklari (BAA) o‘rtasidagi munosabatlar normallashganidan so‘ng Dubay va Tel-Aviv o‘rtasida muntazam tijorat reyslari yo‘lga qo‘yildi.

Foto: Getty Images

Birlashgan Arab Amirliklarining Flydubai kompaniyasiga tegishli samolyot Dubay va Tel-Aviv o‘rtasidagi muntazam parvozlar doirasida Ben Hurion aeroportiga qo‘ndi.

Ushbu munosabat bilan o‘tkazilgan marosimda Isroil bosh vaziri Benyamin Netanyaxu Tel-Aviv va Dubay o‘rtasida tijorat reyslari boshlangan kunni "tarixiy kun" deb atadi.

Netanyaxu Tel-Aviv va Dubay o‘rtasida muntazam parvozlarning boshlanishi ikki mamlakat o‘rtasidagi munosabatlarning rivojlanishiga hissa qo‘shishini ta'kidlab, BAA va Isroil o‘rtasida imzolangan shartnomaga binoan har ikki mamlakat fuqarolari bir-biriga vizasiz tashrif buyurishlari mumkinligini eslatdi.

Isroil BAAni "yashil hudud" deb e'lon qilganligi sababli bu mamlakatdan kelganlarga karantin qoidalari qo‘llanilmaydi.

Flydubai Dubay va Tel-Aviv o‘rtasida kuniga ikki marta parvoz qiladi.

Isroil va BAA 15 sentyabr kuni munosabatlarni normallashtirish bo‘yicha kelishuv imzolagandi.