Armaniston-Ozarboyjon chegarasida Rossiya chegarachilari joylashtiriladi

Syunik oblastidagi Armaniston-Ozarboyjon chegarasining ayrim uchastkalarida rossiyalik chegarachilar joylashtiriladi. Bu haqda Armaniston mudofaa vazirligi matbuot xizmati xabar berdi.

Vazirlikning bildirishicha, Armaniston mudofaa vaziri Vagarshak Arutyunyan regionga safari chog‘ida rossiyalik tinchlikparvarlar bilan ushbu masalani muhokama qilgan.

Avvalroq Armaniston bosh vaziri Nikol Pashinyan Syunik oblasti uchastkasidagi Armaniston-Ozarboyjon chegarasini aniqlash jarayoni qiyin kechayotganini aytgandi.

Uning so‘zlariga ko‘ra, chegaralarni aniqlash sovet davridagi xaritalar bo‘yicha amalga oshirilmoqda.

Tog‘li Qorabog‘da 44 kun davom etgan janglar davomida 300dan ko‘proq aholi punkti va bir qator strategik tepaliklar Ozarboyjon armiyasi nazoratiga o‘tdi. Jumladan, Ozarboyjonning harbiy g‘alabalari Armanistonni Kelbajar, Ag‘dam va Lochin tumanlarini qaytarib berishga majbur qilgan.