«Britaniya koronavirusi» bolalarga tez yuqadi deb hisoblanmoqda

London imperiya kolleji professori Nil Fergyusonning aytishicha, oxirgi vaqtda koronavirusning yangi shtammi ko‘proq 15 yoshgacha bo‘lgan bolalarda aniqlanmoqda.

Foto: Henry Nicholls / Reuetrs

Koronavirusning Buyuk Britaniyada aniqlangan yangi shtammi bolalar uchun yuqumli bo‘lishi mumkin, dedi London imperiya kolleji professori Nil Fergyuson. Bu haqda Sky News yozmoqda.

Ekspertning so‘zlariga ko‘ra, hozircha olimlar bu holatning mexanizmini tushuna olishmayapti, ammo statistik ma'lumotlar shundan darak bermoqda.

«Shtammning bolalarga yuqishiga moyilligi kuchli. Biz qandaydir sabab-oqibat bog‘liqligini aniqlay olmadik, ammo buni statistikada ko‘rish mumkin», — dedi u.

Fergyusonning aytishicha, oxirgi vaqtda shifokorlar koronavirusning yangi shtammini ko‘proq 15 yoshgacha bo‘lgan bolalarda aniqlamoqda.

Professor Vendi Barklay bunday ma'lumotlarga baho berishda ehtiyotkorlikka chaqirdi.

«Biz bu virus bolalarga aniq yuqadi demoqchimasmiz. SARS-CoV-2 dastlabki paydo bo‘lgan shaklida kattalarga nisbatan bolalarga kamroq yuqqanini bilamiz va bu borada ko‘plab taxminlar bor», — dedi Barklay.

Dekabr o‘rtalarida Britaniya sog‘liqni saqlash vaziri Mett Xenkok mamlakatda virusning yangi turi aniqlangani haqida ma'lum qilgandi.

Mamlakat bosh vaziri Boris Jonsonning maslahatchilariga tayanib ma'lum qilishicha, yangi virus oldingisidan 70 foizga yuqumliroq bo‘lishi mumkin.