Texasdagi qahraton sovuq Yevropada gaz narxi ko‘tarilishiga sabab bo‘ldi

Texas hukumati qahraton sovuq sababli shtatdan tashqariga gaz eksportiga cheklov qo‘ydi.

Foto: Ron Jenkins/Getty Images

Texasda yuz bergan anomal sovuq va gaz eksportining vaqtincha taqiqlanishi natijasida Yevropada gaz narxi ko‘tarildi.

18 fevral kuni Hollandiyaning butun jahondagi narxlarga ta'sir ko‘rsatuvchi TTF habida ming kub metr gaz narxi 213 dollargacha oshdi.

Texas hukumati qahraton sovuq sababli shtatdan tashqariga gaz eksportiga cheklov qo‘ydi. Past harorat elektr energiyasi ta'minotida uzilishlarga sabab bo‘lmoqda, neft qazib olish kamaygan.

Yevropadagi yerosti omborlarida gaz zaxirasi 40 foizdan kamayib ketdi – payshanba kuni zaxira 39,82 foizni tashkil etdi.

Gas Infrastructure Europe portalining ma'lumot berishicha, Germaniyada gaz zaxirasi 31,72 foizga, Avstriyada 42,2, Chexiyada 37,14, Polshada 49,52, Fransiyada 26,48 foizgacha kamaygan.