Yevropa robotaksi sinovlarini tezlashtirishga qaror qildi

Mutaxassislarning ta’kidlashicha, Yevropa robotaksi texnologiyalari bo‘yicha AQSh va Xitoydan ortda qolib ketgan. Shu bois Yevroittifoq avtonom transport vositalari sinovlarini tezlashtirish orqali bu sohadagi raqobatbardoshlikni oshirishni maqsad qilgan.

Yangi tashabbus doirasida kompaniyalar har bir davlatdan alohida ruxsat olish o‘rniga, bir nechta mamlakat hududida soddalashtirilgan tartib asosida sinovlar o‘tkazish imkoniyatiga ega bo‘ladi. Bu robotaksi texnologiyalarini amaliyotga joriy etish muddatini sezilarli qisqartirishi kutilmoqda.

London, Myunxen va Zagreb robotaksi markazlariga aylanmoqda

Avtonom taksilar bo‘yicha dastlabki yirik sinovlar allaqachon Yevropa shaharlarida boshlanmoqda. Xususan, Xorvatiya poytaxti Zagrebda Pony.ai kompaniyasi ishtirokida robotaksi loyihasi yo‘lga qo‘yildi.

Londonda esa bir vaqtning o‘zida Waymo, Wayve va Baidu kabi yirik kompaniyalar robotaksi sinovlarini boshlashga tayyorgarlik ko‘rmoqda. Uber ham Britaniyaning Wayve startapi bilan hamkorlikda Londonda avtonom taksi xizmatini ishga tushirish uchun foydalanuvchilarni ro‘yxatdan o‘tkazishni boshlagan.

Germaniyaning Myunxen shahri esa Uber va Autobrains kompaniyalarining robotaksi dasturi uchun birinchi maydon sifatida tanlangan.

Yevropa AQSh va Xitoyga yetib olishga urinmoqda

Xalqaro energetika agentligi ma’lumotlariga ko‘ra, 2025 yil yakunida AQSh va Xitoydagi robotaksi parklari ikki baravardan ko‘proq o‘sib, 8 mingtadan ortiq avtonom avtomobillarga yetgan. Ular 20 dan ziyod yirik shaharda xizmat ko‘rsatmoqda.

Yevropada esa robotaksi loyihalari turli regulyator cheklovlari sabab bir necha yil kechikkan. Yangi qarorlar ana shu ortda qolishni bartaraf etishga qaratilgan.

Tahlilchilarning fikricha, agar rejalar muvaffaqiyatli amalga oshirilsa, yaqin yillarda Yevropa shaharlarida haydovchisiz taksilar odatiy transport vositasiga aylanishi mumkin.