Jizzaxda yuz bergan YTH oqibatida 3 kishi vafot etdi

Jizzax viloyati Ichki ishlar boshqarmasi xabariga ko‘ra, Navoiy viloyati Nurota tumani “Sintop” qishloq fuqarolar yig‘inida yashagan J.S. boshqaruvidagi “Cobalt” va Forish tumani “Qo‘lba” qishloq fuqarolar yig‘inida yashagan B.T. boshqaruvidagi “GAZ-31” bilan to‘qnashgan.

Ko‘ngilsiz hodisa oqibatida “Cobalt”da yong‘in kelib chiqqan va ushbu avtomashina haydovchisi J.S. hamda uning yo‘lovchisi X.G. kuyish jarohatidan vafot etgan. “GAZ-31” haydovchisi B.T. tuman tibbiyot birlashmasida ko‘rsatilgan yordamga qaramasdan hayotdan ko‘z yumgan, mazkur avtomashinada bo‘lgan yo‘lovchi I.E. esa bosh miya yopiq jarohati, bosh miya chayqalishi, chap boldir suyagi yopiq sinishi tashxisi bilan shifoxonaning travmatologiya bo‘limiga yotqizildi.

Holat bo‘yicha jinoyat ishi qo‘zg‘atilgan, deyiladi xabarda.