Birjada benzin narxi yana ko‘tarildi

O‘tgan hafta davomida, ya'ni 5–11 aprel kunlari "O‘zbekiston respublika tovar-xomashyo birjasi"ning barcha savdo platformalarida 1,74 trln so‘mlik tovarlar sotilgan bo‘lib, bu avvalgi haftaga nisbatan 23,1 foizga ko‘p.

Birja savdolariga 32 328,0 tonna AI-80 markali avtomobil benzini qo‘yildi va ulardan 16 797,4 tonnasi, ya'ni 51,9 foizi sotildi. O‘tkazilgan savdolarda har kuni o‘rtacha 36 xaridor ishtirok etdi.

Ko‘rib chiqilayotgan davrda sotuvchi korxonalar AI-80 markali avtomobil benzinining o‘rtacha boshlang‘ich narxlarini mahsulotning bir tonnasi uchun 6,24 mln so‘mdan 6,30 mln so‘mgacha yoki 1,0 foizga ko‘tarishdi. Shu munosabat bilan, AI-80 markali avtomobil benzinning o‘rtacha kunlik narxi ham 6,24 mln so‘mdan 6,30 mln so‘mgacha, ya'ni 1,0 foizga ko‘tarildi.

O‘tgan haftada AI-80 rusumli avtomobil benzinning o‘rtacha haftalik kotirovkasi 6,24 mln so‘mni, AI-91 – 7,38 mln so‘mni tashkil etdi.

Turli manbalarda keltirilishicha, avtomobil benzinining bir tonnasi o‘rtacha 1293-1370 litrni tashkil qiladi.

29 mart - 4 aprel kunlari ham AI-80 markali avtomobil benzinining o‘rtacha kunlik narxi bir tonnasi uchun 6,27 mln so‘mdan 6,28 mln so‘mgacha, ya'ni 0,2 foizga ko‘tarilgandi.

Ma'lumot uchun, 2020 yil 1 maydan boshlab AI-80 markali avtomobil benzini va dizel yonilg‘isi, shu jumladan EKO markali dizel yonilg‘isi chakana narxlarini davlat tomonidan tartibga solish bekor qilingan. Neftni qayta ishlash zavodlari ularni faqat birja savdolari orqali sotadi.