SpaceX Oyga astronavtlarni olib borish bo‘yicha shartnomani qo‘lga kiritdi 

Ilon Maskning SpaceX kompaniyasi astronavtlarni Oyga olib borish bo‘yicha NASA shartnomasini qo‘lga kiritdi, deb xabar qilmoqda kosmik agentlik. 

Shartnomaga Amazon asoschisi Jyeff Bezosning Blue Origin kompaniyasi ham da'vogarlik qildi, u Lockheed Martin, Northrop Grumman va Draper bilan sa'y-harakatlarni birlashtirdi.

Ammo, natijada 2,89 milliard dollarlik shartnoma SpaceX’ga berildi. Kompaniya «Artemida» (Artemis) dasturi doirasida Oyga astronavtlarni qo‘ndirish uchun qo‘nish modulini loyihalashtiradi va quradi. 

Dasturning birinchi bosqichi 2021 yilga mo‘ljallangan. Uning doirasida Space Launch System raketasida o‘rnatilgan Orion kosmik kemasining Oy atrofida parvozi va Yerga qaytishi rejalashtirilgan. Ikkinchi bosqichda, 2023 yilda kema ekipaj bilan Oy atrofida parvoz qiladi. NASA sun'iy yo‘ldoshiga qo‘nishning o‘zi 2024 yilga mo‘ljallangan. 

«Artemida» kosmik dasturi AQSh hukumati tomonidan moliyalashtiriladi. Uning maqsadlaridan biri - birinchi ayolni sun'iy yo‘ldoshga yuborish. NASA’ning umid qilishicha, ushbu dastur Oyda doimiy aholi punktini yaratishga qo‘yilgan qadam bo‘ladi.

Ushbu kosmik dasturga Yevropa kosmik agentligi (ESA), Yaponiya, Kanada, Avstraliya, Buyuk Britaniya va boshqa qator mamlakatlar ham qo‘shildi. Rossiya AQSh bilan qo‘shma dasturda ishtirok etishdan bosh tortdi.