Nukus yaqinida uchta avtomobil to‘qnashib, 6 kishi halok bo‘ldi

Qoraqalpog‘iston YXHB matbuot xizmati Kun.uz'ga ma'lum qilishicha, voqea 11 may kuni sodir bo‘lgan. Nukus-To‘rtko‘l yo‘lining 225 kilometri (Chilpiq yodgorligi qarshisi)da Cobalt, Nexia va Damas o‘zaro to‘qnashib ketgan. Avariya natijasida jami 6 kishi halok bo‘lgan.

Cobalt’dagi 1 nafar yo‘lovchi, Nexia’dagi 4 nafar yo‘lovchi va Damas haydovchisi voqea joyida jon bergan. Nexia va Cobalt haydovchilari shifoxonaga yotqizilgan. Ularning holati bo‘yicha ma'lumot yo‘q.

Hozirda holat yuzasidan tergov harakatlari olib borilmoqda.

Bundan avvalroq 8 may kuni Qashqadaryo viloyati Kasbi tuman «Toshqo‘rg‘on» mahallasi hududidan o‘tuvchi 4R-92 Qarshi—Talliqo‘rg‘on—Kasbi—Jyeynov avtomobil yo‘lining 26 kilometrida sodir bo‘lgan YTH oqibatida 7 kishi halok bo‘lgani xabar qilingandi. 

Shuningdek, 10 may kuni Farg‘ona viloyati Yozyovon tumani hududida ikkita Cobalt avtomashinasi to‘qnashishi 6 kishining hayotiga zomin bo‘lgan.