Qirg‘izistonda chegaradagi qishloqlar fuqarolariga qurol berish taklif qilindi

Qirg‘izistonda «Chegaraoldi vakolatli shaxslari» to‘g‘risidagi qonunga o‘zgartirishlar kiritish bo‘yicha loyiha parlament muhokamasiga kiritildi, deb xabar bermoqda Kloop nashri.

O‘zgartirishga ko‘ra, Qirg‘iziston davlat milliy xavfsizlik qo‘mitasi chegaraoldi hududlarida yashovchi fuqarolarga o‘qotar va jangovar qurol berishi mumkin bo‘ladi.

Hujjatda aytilishicha, qurolni faqat «chegara oldida yashovchi vakolatli shaxs» maqomiga ega fuqarolar olishi mumkin. Fuqarolarga ushbu maqom xavfsizlik qo‘mitasi tomonidan beriladi.

Hozirda amaldagi qoidalarda «chegara oldida yashovchi vakolatli shaxslar»ga qurol berish ko‘zda tutilmagan. Fuqarolar davlat chegarasini qo‘riqlashda chegarachilarga yordam berish uchun jalb etilishi mumkin xolos. 

Avvalroq Qirg‘iziston sobiq bosh vaziri Feliks Qulov chegaraoldi hududlarida yashovchi aholiga qurolga ega bo‘lish imkonini berish masalasini ko‘targandi.