Xatlonda birinchi o‘zbek-tojik mintaqalararo forumi bo‘lib o‘tadi

Joriy yil 9 iyun kuni Xatlon viloyatining ma'muriy markazi - Bo‘xtar shahrida birinchi o‘zbek-tojik mintaqalararo forumi bo‘lib o‘tadi. Bu haqda «Aziya-Plyus» Tojikiston hukumatidagi manbaga tayangan holda xabar qildi.

Forumda ikki davlat hukumatlari vakillari, O‘zbekiston va Tojikiston viloyatlari rahbarlari hamda qo‘shni davlatlarning tadbirkorlari ishtirok etishadi.

Manbaga ko‘ra, forumda yirik investitsiya loyihalari va savdo shartnomalarini amalga oshirish to‘g‘risidagi shartnomalar, tadbir yakunlari bo‘yicha imzolanishi rejalashtirilgan tegishli hujjatlar muhokama qilinadi.

O‘zbekiston delegatsiyasi «Dang‘ara» va «Panj» erkin iqtisodiy zonalariga tashrif buyurishi ham kutilmoqda.

Nashr manbasi bunday forumlarning o‘tkazilishi yaqin kelajakda o‘zbek-tojik tovar ayirboshlash hajmini 1 milliard dollarga yetkazish bo‘yicha belgilangan vazifani bajarishga imkon yaratishiga ishonch bildirdi.

Eslatib o‘tamiz, O‘zbekiston prezidenti Shavkat Mirziyoyev 10-11 iyun kunlari rasmiy tashrif bilan Tojikistonga boradi.

Bundan oldin, O‘zbekiston va Tojikiston o‘rtasida avtobus qatnovi qayta tiklanishi mumkin ekani xabar qilingandi.