Rossiyada AstraZeneca vaksinasini ishlab chiqarish yo‘lga qo‘yildi

Rossiya sanoat va savdo vazirining birinchi o‘rinbosari Vasiliy Osmakovning so‘zlariga ko‘ra, ichki bozor uchun mahalliy vaksinalarning o‘zi yetarli.

Foto: RIA Novosti

Rossiyaning "R-Farm" farmatsevtika kompaniyasi Oksford universiteti litsenziyasi bo‘yicha AstraZeneca vaksinasini ishlab chiqarishni yo‘lga qo‘ydi. Bu haqda Rossiya sanoat va savdo vazirining birinchi o‘rinbosari Vasiliy Osmakov ma'lum qildi.

"Rossiyada xorij vaksinalari ishlab chiqarilmoqda, "R-Farm" eksport uchun AstraZeneca vaksinasini ishlab chiqarmoqda", - dedi Osmakov.

Uning so‘zlariga ko‘ra, ichki bozor uchun mahalliy vaksinalarning o‘zi yetarli.

"R-Farm" direktori Vasiliy Ignatev may oyida kompaniya iyunda Oksford universiteti va AstraZeneca kompaniyasining koronavirusga qarshi vaksinasini ishlab chiqarishni boshlashini aytgandi.